Male, Maldiv orollari — 2025-yil 30-noyabr

Centrum Air Toshkentdan Malega ilk to‘g‘ridan-to‘g‘ri reysini muvaffaqiyatli amalga oshirganini mamnuniyat bilan ma’lum qiladi. Mazkur parvoz aviakompaniyaning xalqaro yo‘nalishlar tarmog‘ini kengaytirish yo‘lidagi muhim bosqich boʻldi.

C6531 raqamli birinchi reys Toshkentdan mahalliy vaqt bilan 01:35 da jo‘nab, 08:05 da Malega yetib bordi. Samolyot iliq va tantanali tarzda kutib olindi. Male aeroporti ma’muriyati yerusti xizmatlari bilan birgalikda ekipaj va yangi yo‘nalishning ilk yo‘lovchilarini qarshi olish uchun maxsus dastur tayyorladi.

Havo kemasi yetib kelishi bilan yangi ochilgan yoʻnalish va hamkorliklarni qutlash ramzi hisoblangan an’anaviy suvli salyut bilan kutib olindi. Yo‘lovchilarni aeroport vakillari gullar, kutib olish bannerlari va aynan shu sana uchun bezatilgan maxsus yo‘lak orqali kutib oldi. Ko‘plab sayohatchilar uchun Centrum Air’ning Maldiv orollariga birinchi tarixiy reysida qatnashish alohida yoqimli taassurot bo‘lgani qayd etildi.

Inauguratsion parvoz zamonaviy va qulay Airbus A320neo bortida amalga oshirildi. Samolyotda boʻlgan sayyohlar, oilalar va travel-blogerlar parvoz davomida ko‘rsatilgan e’tibor, xizmat sifati va bortdagi qulay muhit haqida ijobiy fikrlar bildirdilar.

Male–Toshkent yo‘nalishidagi birinchi qaytish reysi C6532 ham 09:20 da jo‘nab ketib, yuqori yuklama bilan amalga oshirildi. Bu ikki mamlakat orasidagi to‘g‘ridan-to‘g‘ri aviaqatnovga bo‘lgan katta qiziqishni yana bir bor tasdiqladi.

Haftalik yakshanba reyslari yo‘lga qo‘yilishi Centrum Air xalqaro rivojlanishida yangi sahifa ochilmoqda. Shu tariqa o‘zbekistonlik sayohatchilar dunyoning eng yaxshi kurortlaridan biriga qulayroq tarzda yetib borish imkoniga ega bo‘ldi.